راديو النجاح – برنامج راحة مع إسراء ديوكات احسبها صح – الحلقة الأولى
-لو سألتك ليش بتدرس بالجامعة أكيد رح تحكيلي عشان الشهادة و عشان أشتغل و يكون معي مصاري، بس بعد 4 سنين من اليوم و لما تتخرج رح تحس إنه هال4 سنين كانوا من أحلى أيام عمرك..لهيك رح أسالك ليش بتدرس وشو اللي بخليك مبسوط بالجامعة؟!
فيه ناس رح تحكي لإنه أنا درست تخصصي يلي طول عمري بحلم فيه ..
وفيه ناس صح إنه تخصصهم مش عاجبهم بس بروحوا كل يوم عالجامعة مبسوطين لإنهم بحبوا جامعتهم..ودايماً بآخر أيام التخرج بنلاقي ناس بنزلوا عمواقع التواصل الاجتماعي .. إنو قديش همه زعلانين و رح يشتاقوا لبيتهم الثاني.
أما الناس اللي بتلاقيهم من الصبح صاحيين متحمسين بدهم يلاقوا أصحابهم وبروحوا سوا بالباص عالجامعة وبضلوا بالمحاضرات و البريك دايما سوا، هدول الناس حتى ترويحة الباص بالنسبة الهم متعة لإنهم دايما بتشاركوا كل شي مع بعض، فبتلاقي ناس ترويحة الباص بالنسبة الهم نوم ..و نااس الباص بالنسبة إلهم وقت ليقضوه سوا ..و نااس بالنسبة الهم ترويحة الباص للدراسة و ناس بفكروا بشغلهم يللي رايحين عليه وناس عم يخططوا لأشياء جديدة بحياتهم.
فالجامعة بطلت بس شهادة و شغل بعد الشهادة .. الجامعة صارت مكان أنا مبسوط فيه .. وناس بحبهم .. وتخصص طول عمري بحلم فيه .. ومكان .. أطور شخصيتي فيه عشان ما أدخل الجامعة سنفور و أطلع منها سنفور.
في ناس بوسعوا علاقاتهم و بستفيدوا من خبرات كل حدا بقابلوه .. بحاولوا قدر الإمكان يتعلموا أشياء جديدة و بياخدوا دورات كمان ليكونوا اليوم أحسن من مبارح .. وبكرة أحسن من اليوم عشان بس يتخرجوا يكونوا اختصروا عحالهم وقت كثييير و أخدو خبرة يقدروا يدخلوا فيها سوق العمل.
ولسا كمان بتعرف إنه دراسة الجامعة عبادة، لإنه طلب العلم عبادة ..
ولما تتذكر انه ربنا شايفك دايما و عالم بتعبك ومحاولاتك لتتعلم ، وقتها بتصير تعمل اللي عليك وتترك الباقي على ربنا بكل توكل و راحة، بس إنه ما يضيعلك تعب مش معناها علامات عالية .. لا ..استنى شوي .. يللي بتدرسه اليوم بكرة رح تشتغل فيه بايدك.
ورح تنحط بمواقف بدك تطبق فيها كل اللي تعلمته و حاولت تتعلمه..
الطبيب الشاطر اليوم فهو كان تعبان عحالو وقت الجامعة والتدريب .. أما الناس يللي بموتوا من ورا خطأ طبي اليوم فلإنه ما أعطى هالطبيب علمه حقه من التعلم.
و بالنهاية كل شي برجعلك … فبهي اللحظة شوف إنت لوين حابب توصل بعد 4 سنين و بلش فيه من اليوم عشان تحس بكل حياتك بالراحة .
