رواد النجاح – فاطمة وشاح

راديو النجاح – رواد النجاح – فاطمة وشاح

 

الأكيد انه بدري كتير نحكي عن قصص نجاح لأنه إحساسي بقول إنه هاي مواضيع بنحكى فيها بعد التقاعد ولحساسيتي الشخصية من المصطلح، لكن أتوقع ممكن نحكي عن البدايات.
أول مرة دخلت راديو النجاح كانت من سنتين للمشاركة بدورة عن تقارير الها علاقة بالتطرف، وبعد سنة تواصل معي أستاذ عبيدة فرج الله بخصوص منحة تدريبية بدت بشهر ٨ واستمرت لشهر ٣، سعدت جداً بهالفرصة وأكيد ممتنة للمدربين واحد واحد.
رزان الزعبي الحِركة الذكية الدقيقة بشغلها الي بتتواصل مع ١٠٠ حد سوا، وسارة المومني الي مجال اهتمامها الصحفي بطبق على عقلي كثير وهو الاستقصاء بمواضيع حقوقية مهمة جداً من قضايا معتقلين ورأي وحقوق الإنسان، وأسماء فرج الله صاحبة الصوت الجميل والطبع الهادئ، الإنسانة الداعمة والمتفهمة خاصة بعد مروري بظرف سيء جداً خلال فترة التدريب وهو وفاة والدتي الله يرحمها، شكراً لمحمد عبد الله مهندس الصوت الي برنامجي بحكم طبيعته كان من أكتر البرامج الي بتاخد منه جهد ودايماً بعجقه ضيوف واتصالات ومداخلات وهو قدها طبعاً، وأستاذ عبيدة الي بدأ معنا التدريب وتابع شغلنا بعدين، شكراً كتير على الملاحظات التشجيعية على البرنامج ومواضيع الحلقات والتقارير.
المعرفة والخبرة الي تكونت كانت نتاج جهد مدربين وعمل مع زملاء، بخص بالذكر شروق النسور ودنيا بدر، كتير انبسطت بالتغطيات معكم، وطبعاً نتيجة ثقة أعطوني إياها المصادر فشكراً كثير الهم وللناس الي تعاملت معها أثناء عملي على حلقات وتقارير وتغطيات سواء كانوا أصحاب قضايا أو ناطقين إعلاميين لجهات ومؤسسات أو صحافيين، وبعتذر من الي ما قدرنا نطلع بمشاركاتهم سواء لأسباب فنية أو رقابية أو غير ذلك..

التعليقات