البرامجبلبلة

بلبلة مع فرح محاسنة وفرح جراح – الصباحات

بلبلة – الحلقة الأولى

يا مية اهلا وسهلا بكل مستمعين ومتابعين راديو النجاح معكم فرح جراح وفرح محاسنة من برنامجكم بلبلة.

عمرك سألت حالك هل المواقف اللي بتصير معك بالجامعه بتعنيلك؟ او بتهمك؟ او هل تفاصيل حياتك الجامعيه كان الها اثر على شخصيتك؟ احنا هون ببرنامجكم بلبلة لحتى نبينلكم انه الجامعة و تفاصيلها و مواقفها اخدت جزء من قلبك ما بتقدر تستغني عنه!

يا هيك الصباحات يا بلا .. احلى صباح صباح عمان و خصوصاً الجامعه الأم .. الجامعة الاردنية بكل تفاصيلها .. طلابها .. اشيائها الزاكيه .. شوارعها الحلوة و ناسها الأحلى .

ومن صباح الجامعة الاردنية بدنا نصبح على كل طلاب التكنو ونقلهم يا صباح الخير وصباحنا اكيد غير.

فرح شو رأيك تحكيلنا شوي عن صباحك بالتكنو؟

الصباح عنا بالتكنو كتير حلو صيف وشتاء ،ربيع او خريف، اول ما تدخلي الجامعة بتلاقي الشجر والورد على اليمين واليسار صوت العصافير والمي اللي بتسقي الزرع لحاله بيعطي تفاؤل وطاقة ايجابية ونفس عميق لحتى نبدأ يومنا الطويل قبل الساعة 8  كل حدا منا بكون بعمل اشي السنفور مثلا فاتح جدوله بدور على مكان المحاضرة واللي حافظ الجامعة واله وقت فيها بكون قاعد مروق بشرب نسكافيه قبل لا يدخل عالمحاضرة او بكون لسا ما وصل بمشي معجوق وبدعي الله انه يدخل عالمحاضرة متلي انا مثلا انتي فرح صباحك كيف بالاردنية بكون ؟؟؟

صراحه انا من الناس اللي كتير بحب اوصل عالجامعة بكير .. يعني سبعة و نص بالكتير بتلاقيني وصلت .. ماشية بشارع الزراعة .. هون و هون شجر .. بطلع عالهندسة بتلاقيني قعدت بالكورت بشرب النسكافيه مع صاحبتي .. حولينا الشجر و الورد .. صراحه اجواء الصبح بالهندسه شيئ جميل .

في ايام بنصحى فيها مبسوطين وايام بنصحى زعلانين ايام نشيطين ومتحمسين وايام كسولين ايام بنتصبح بمسج حلو زي مثلا التغت المحاضرة الأولى ، و مرات صباحنا بيكمل بالناس اللي بنحبهم .. كل حدا فينا بيبدأ يومه باشي بيحبه .. ناس بتشرب القهوة بسرعة و هي رايحة عالمحاضرة .. و ناس بتحب توصل بكير و تشربها عرواق .. كل حدا في بصباحه تفاصيل صغيره بس بتعنيله كتير .. خلينا نسمع سوا شو هالتفاصيل بالنسبه للشباب و الصبايا ..

بتعرفي فرح في كتير ايام بنصحى فيها متكاسلين ما بدنا دوام ولا محاضرات ولا تعب المواصلات

فعليا صح ! .. بس بتعرفي انه بتقدري تحولي هاد الكسل لنشاط ؟؟كيف برايك ؟؟؟

هلأ انتي الصبح أول ما تطلعي من البيت بدل ما تركبي المواصلات على طول بتقدري انك تمشي بس لو خمس دقايق  .. لانه زمان كانو كتير يحكولنا انه الهوا الصبح بكون كتير نقي و بخليكي تتنشطي و تصحصي .

كل حدا فينا بيحب الصبح يقعد بمكان معين بالجامعة.. شو اكتر مكان بتبحي تقعدي فيه؟

 

صراحه انا كتير بحب اقعد عند المكتبة الرئيسية بعد الدوام بتكون الاجواء جدا جميلة.

جميل انا بالنسبة الي بحب  اقعد بكفيتيريا الملاعب عنا بالهندسية واكل سندويشة فرنسي وازا كان الجو حلو بروح عالبحيرة ، بالبحيرة في عنا قعدات حلوة واكيد هي اكتر مكان بحبوا طلاب التكنو يلتقطوا الصور فيه.

صراحة اشي كتير مميز و حمستيني ازور التكنو عشان اشوفها!!

خلينا نشوف الأن شو اكتر مكان بحبو الطلاب يقعدوا فيه الصبح اول ما بيوصلوا؟

في ناس جدا كسولين وكل يوم الصبح بصحوا وهم مش طايقين حالهم ، لأنهم مش شبعانين نوم لازم تكون فترة النوم كتير منيحة بالليل بدون سهر لأنه النوم بالليل بريح الجسم وبخلينا نصحى مسترخين بدون تعب.

حتى بتعرفي  المرة الماضية قرأت معلومة بتحكي انه لو انتي كل يوم حطيتي المنبه بنفس الوقت .. بعد فترة رح يصير جسمك يصحى بهالوقت لانه تعود عليه بدون الحاجة للمنبه .

الناس اللي عمرها ما فكرت شو التفاصيل اللي بتحبها الصبح او عمرهم ما دققوا فيها فكروا فيها واتأكدوا انكم رح تشوفوا كم هي مهمة بيومكم وانه بدونها مش رح يكمل هاليوم .

و هيك بنقدر نحكيلكم انه صباحنا انا و فرح بدأ بشيء جدا حلو و اللي هو هاي الحلقة .. بتمنى تكون نالت اعجابكم ..

بأمكانكم  أتابعونا من خلال الموقع الألكتروني النجاح Annaja7.com او من خلال تطبيقات السمارت فون App Store & Play Store

استنونا بالحلقة الجاي من برنامجكم بلبلة .

 

 

اظهر المزيد

مقالات ذات صلة