راديو النجاح – قديش مهم مع أوس الغول إنت شو قررت – الحلقة الثالثة
-لو كنت مابتعرف تسبح وكنت على متن سفينة ووقعت بالبحر هل رح تستلم للأمر الواقع وتسترخي بكل شجاعة لتستسلم للموت؟، هل ما رح تحاول إنك تسبح لو حكالك الناس اللي على السفينة وقف إنت مابتعرف تسبح؟، الجواب قطعاً لا بكل حالات الغرق كل الناس الي كانوا بوسط البحر حاول حتى آخر طاقة حتى آخر نفس حتى آخر نبضة.
بها الحياة إذا قررنا نستسلم أمام مشاكلها اللي بتشبه بحد كبير الموت في حالة الغرق إحنا منكون أعلنا عن حالة موتنا وبجوز مهم ندرك إنه الموت اللي إحنا بنعرفه هو لما بتوقف الإنسان عن النبض والنفس لكن الموت الحقيقي لما بتوقف الإنسان عن العطاء والتميز.
الحياة بتعلق بإتخاذ القرارات لهيك لما تكون حياتنا سيئة أو جيدة فهذا الشي بسبب قراراتنا، لما نتكلم عن التميز فهذا قرارنا لما نقرر إنه نكون أحسن (موظف) أو إنه نأسس شركة رائدة، أو نصنع فرصة من العدم، أو نفوز بمسابقة أو نكون رقم صعب فهذا قرارنا لما نقرر نقول لا لكل اللي ظلمونا نقول لا لكل اللي بدهم يوخدوا حقوقنا نقول لا لكل اللي بدهم يوقفونا فهذا قرارانا لما نقرر نكون حد ضعيف، مكسور الإرادة، مسلوب الهمة، ضايع، حزين وحيد، فهذا قراراك لما تقرر تكون أحسن أم أو أب زوج أو زوجة أو أروع أخ أو أخت أو حتى صاحب أو صاحبة فهذا قرارنا.
إحنا بنحتاج بهالحياة لأربعة أمور خلينا نحطهم بشنتة سفرنا وإحنا ونسعى بأرجاء هالارض :
بنحتاج لشيء نعمله، هون خلونا ندور على شغفنا على كل شي بنحب إنه نعمله ونكبر فيه، بنحتاج لشخص نحبه صديق أو صديقة زوج أو زوجة أخ أو أخت حتى أم أو أب، بنحتاج لشي منآمن فيه، رب كبير يحمل همنا لما ننكسر لما نحتاج نحكيله يفهمنا نطلب منه ويعطينا، بنحتاج لشيء بنسعى إنه نصل إله، حلم أكبر من الدنيا وأصغر من إرادتك هدف (عظيم)، غاية مشّرفة، طموح عالي.
قديش مهم نعرف إنه في قاعدة بهالحياة بتعطينا خيارين بس وإحنا لازم نتخذ قرار إما إنه نكبر أو نموت. شخصياً قررت أكبر بس إنت شو قررت؟.
