راديو النجاح – برنامج منا وبينا مع مريم الجميلي – يوسف طاهر الوهب
مسائكم نجاح مستمعينا، وأهلا بيكم ابرنامج منا وبينا…
حلقتنا هاليوم عن شخصية انست، عن شخصية كل كباريتنا وجدودنا يتذكروه، بس محد من الشباب سمع بيه.
حلقتنا عن رجال عاش ابلاط الملك فيصل الثاني رحمة الله عليه وخدم تحت امرته، عن رجال كرس حياته للعسكرية والرياضة، عن بطل من أبطال العراق بالعاب القوى والسباق واخيرا، عن شخص اتسمة ذات يوم بالحكم الذهبي.
اسمه يوسف طاهر الوهب، انولد ابغداد من عائلة عريقة عام 1932 وهو أخ لعشرة اخوان وخمس بنات.
بدة مسيرته الرياضية من عمر صغير وجانت أول بطولة رسمية اله هي بطولة بغداد للمدارس الابتدائية، بحيث أحرز مرتبة متقدمة ووراها بدت سلسلة نجاحاته تزدهر وتكبر شوية شوية.
ولمن دخل للكلية العسكرية حاز على جائزة أفضل رياضي عسكري بالكلية بدورتها ال28، وطبعا هذا شي جبير جدا بالنسبة لكلية احتوات مئات من أفضل الرياضيين بالعراق.
وبسباق بغداد المفتوح كسر الوهب الرقم القياسي السابق وسجل رقمه القياسي الجديد والي جان دقيقتين وثمن أعشار من الثانية، ومنكسر هالرقم إلا بعد سنين طويلة.
تخرج بأول دفعة للحكام الدوليين العراقيين لكرة السلة والي جان عددهم 4، اعتزل 3 منهم وبقة هو الوحيد بعدها لسنين هواية بالاضافة إنو صار رئيس لرابطة الحكام العراقية.
ومننسة إنو حكم بالمباراة النهائية لبطولة العالم العسكري عام 1967 بايطاليا وحصل بهالمباراة على لقب الحكم الذهبي، اعتزل الوهب عام 1985 بمباراة اعتزال خاصة وحفل عملاق.
هالإنسان الي كرمه كل الملوك والرؤساء الي عاصرهم والي انعزفلة السلام الملكي والجمهوري بمحافل هواية تكريما لانجازاته هو مجرد إنسان عادي بدة من مرحلة الصفر مثلنا تماما، حلم وركض ورا احلامه، مهتم لكثرة المحبطين، مهتم للي كلوله شحتستفيد من الي دتسويه هسة، بنا حياته من طابوكة وحدة لحد ما بنى مكانته بتعبه وبجهده.
يجوز سمعتوني هواية اكولها، بس ضل ورا احلامك، لتيأس ولتندم على قرار اخذته مهما كان.
وهيج انتهت حلقتنا لهاليوم جانت وياكم مريم الجميلي من راديو النجاح وهذا برنامج منا وبينا.
ودمتم في امان الله .
