راديو النجاح – برنامج راحة مع إسراء دويكات ناسك شو أخبارهم – الحلقة الثانية
-لو حكيتلك فكر بحدا بهي اللحظة، مين هو الشخص اللي بيخطر عبالك و هالشخص ايش بعنيلك ؟
رح تحكيلي هو كل اشي بالنسبة الي ..غالي عقلبي ..و بحبه كثير
طيب إنت شو عملت ليعرف مكانته عندك…
بتعرفوا شو مشكلتنا .. إنه احنا بس نضمن محبة الناس النا ما بنرجع نجدد علاقتنا فيهم .. ولو بكلمة حب نذكرهم بهي المحبة .. ودايما طبع الإنسان ما بحس بغلاوة الشي اللي بحبه إلا بس يخسره أو يقرب يخسره.
لو راجعت قائمة الأسماء عندك إسم إسم أو حتى الصور القديمة .. قديش فيه ناس عزيزين عليك من زمان ما حكيت معهم و ما بتعرف عنهم أي اشي.
أحلى ذكريات سنين عمرك عم ترجع من صورة بس الشخص نفسه يللي بالصورة مش عارف إنك لسا بتتذكره و مشتاقله، بطلت الشغلة إنه احنا ما بنحكي لناسنا يللي معنا بهي اللحظات و بشاركونا ظروفنا الحلوة و المرة قديش احنا بنعزهم .. لا .. صار فيه ناس كمان عاشوا معنا أيام و ظروف زي هيك بالضبط وبطلنا نحكي معهم من ورا مشاغل الحياة و ما بنعرف عنهم أي إشي ..الحياة ماشية بنفس الروتين .. ناسك اليوم ممكن يصير فيهم زي ناسك زمان ..
العمر بخلص و الشغل و المشاغل ما بتخلص .. لهيك أعطي و لو 10 دقايق من وقتك باليوم ..لأهلك ..ناسك و أصحابك أو أيي حدا بتحس إنه الدنيا نورت بعيونك بس تشوفه .. بتحس بالفرحة تلقائيا وإنه هالشخص غالي كثيييير عليك..
التقدير و التعبير عن المشاعر شغلات مش لازم الوقت يسرقها منا ..حكينا بكل الأحوال الشغل عمره ما بخلص بس لا تخلي المعزة يللي بنيتها بسنين تخلص لانك حاطط ببالك انك ضامن معزة الناس الك و ما بتسال عنهم و لو ل 10 دقايق كل كم يوم .. ورح تضل تحكي بكرا رح أحكي معه، و كل يوم رح تضل تحكي لبكرا وإنت عارف إنه رح تمضي أشهر مش شايفهم ولا حتى حاكي معهم و لا باعتلهم حتى كلمة كيفك .. وأي كلمة يحس الشخص انه لسا فيه شويية معزة من قلبك اله.
رصيد المعزة مش اشي مطلق .. ونص المحبة اهتمام .. لا تحكيلي ما فيه وقت .. الوقت اللي بتاكل فيه أرسل هي الرسالة .. لوحتى قبل ما تنام .. أو وإنت بالباص الصبح .. رسالة وحدة ما رح تضيعلك وقتك .. بتعرف إنه هال10 دقايق كل كم يوم رح تجدد المحبة فيها بينك و بين الناس .. وإنه هال10 دقايق أحسن من مكالمة ساعتين كاملات و لمرة وحدة بالشهر.
لو بعتت هالرسالة قبل ما تنام .. مش بس همه رح يتفاجؤوا فيها و ينبسطوا .. لا حتى إنت رح تنبسط بالرد و رح تجدد طاقة الحب حواليك وبتكون عم تستعيد ناسك و تحافظ عليهم ..
وبالنهاية.. الحب تشارك و انت المستفيد كمان عشان تحافظ على هالة الفرح .. بحياتك .. وتذكر إنه أي شي بصير معك رح تلاقي ناسك هدول حواليك .. لهيك حافظ عليهم..
