ناس نجاح – ميس محمود من الحلم إلى الحقيقة

راديو النجاح – ناس النجاح ميس محمود من الحلم إلى الحقيقة

كلنا بنحلم من وإحنا صغار شو رح نكون بالمستقبل، ومن هون بدأت قصتي من وقت كنت صغيرة كنت دايماً أمسك الريموت وأوقف قدام المراي وأبدأ أعمل حالي مذيعة وأستضيف ناس وآخد اتصالات وهمية يعني عايشة الدور صح.
بالمدرسة شجعوني معلمات العربي إنه أكون مسؤولة عن فقرات الإذاعة الصباحية وحتى وقت الإحتفالات الرسمية كان لازم أكون مقدمة الحفل.
خلصت توجيهي بمعدل 95.7، وهون بدأ التحدي أنا بدي أدرس صحافة وإعلام لكن آراء كل يلي حوالي كانت إنه حرام تضيعي معدلك العالي بتخصص الإعلام بالإضافة إنه هالتخصص ما كان موجود إلا بجامعة اليرموك وأنا طموحي أدرس في الجامعة الأردنية وبعد تفكير طويل قررت أدرس الأدب الإنجليزي في الجامعة الأردنية وتركت المذيعة يلي جواتي تاخد فترة استراحة.
خلال دراستي في الجامعة حاولت أشتغل أكتر ع موهبتي وفعلأ أخدت دورتين دورة إعداد وتقديم برامج إذاعية مع الإعلامي معتز نعواش ودورة تحرير صحفي مع الإعلامي محمد أبو فريج، وبعد هيك تخرجت وبدأت عملي كمعلمة لكن شغف المذيعة يلي بداخلي ما كان عم ينطفي لحد ما هيألي القدر فرصة إنه أقدم طلب لراديو النجاح ومعهم قدرت ألتحق بدورة تدريبية.

وقت شفت نموذج تعبئة الفورم كان آخر يوم وتحديداً باقي عشر دقائق ورح ينتهي التسجيل وقتها سريعاً كتبت معلوماتي، وأرسلت الإيميل وما كنت عارفة إنه هي بداية تحقيق حلم الطفولة.
بعد فترة بتلقى اتصال هاتفي من راديو النجاح، إنه عندي مقابلة وبناء عليها رح نعمل تِست صوت توجهت من الصبح للراديو وتمت المقابلة ع خير وبدأت أول يوم تدريبي بتاريخ 27/8/2016 بعد شهرين خلصت الدورة وصار لازم نعمل برنامج وهون بدأت أصعب مرحلة من فكرة البرنامج الأول يلي لازم تكون جديدة مروراً بإعداد نصوص الحلقات والتنسيق مع الضيوف وختاماً بعنوان البرنامج.
وبعد مشاورات عديدة مع إدارة الراديو طلعت بفكرة برنامج كتاب وقهوة وبعدني للآن بتذكر كلام ياسمين مهندسة الصوت وقت سجلتلي أول حلقة وقالتلي ما ألطفك وما ألطف صوتك.

وأخيراً وبعد طول انتظار تم بث الحلقة الأولى بتاريخ 6/9/2017 بعد سنة تقريباً من بداية مشواري براديو النجاح.