راديو النجاح – قديش مهم مع أوس الغول الحياة اختيارك – الحلقة السادسة
-قررت الحياة تشن عليه حرب وأصعب حروب الحياة هو المرض، عمي حامد دخل وأنا متواجد في قسم الأشعة وتخيل لما دخل شو كان يعمل؟ كان يغني، كان يغني بصوت أرهقه الزمن وهو برسم إبتسامة بيدعي فيه القوة والإنتصار كانت صدمة بالنسبة اللي، وصابني الفضول وسألته عمو ما شاء الله صوتك حلو من زمان بتغني؟ فحكالي قصته ورجعني بثواني وبدون الحاجة لآلة زمن 66 سنة لما كان عمره 14 سنة كان يغني وهو بالصف فسمع صوتي الأستاذ وبصوت فيه حزم، حكى مين اللي كان يغني فهو خاف وماحدا رفع إيده، وبمحاولة من الأستاذ لحتى يرفع إيده هالطالب حكى مين اللي صوته حلو بدي أوخده على الإذاعة لحتى يغني فيها وهون الطالب وقع بالفخ، فلما رفع إيده أخده المعلم لعند المدير اللي مثل ما بيحكي عمي حامد إنه جداً كان قاسي وبلش ضرب فيه، فحكالي بتعرف شو كنت أعمل وهو بيضرب فيي؟ حكالي إنه كان يغني وهو بيعيط، ومن هداك اليوم وهو بيغني وهو بيعمل الشي اللي بحبه.
صَورت عمي حامد وقبل ما أعطيه الصورة اللي في كل مرة وضعها بزداد سوء ولأني شعرت إنه ما بضمن الأيام القادمة إنه ممكن أشوفه سألته عمو حامد إيش بتنصح شب بعمري نصيحة ممكن إنها تساعده ليعيش بسعادة فحكالي يا صديقي عيش حياتك مثل ما بدك بشرط إنك تبعد عن الحرام، هاي كانت فلسفت عمي حامد الرجل اللي بلغ من العمر 80 سنة.
في كم مرة بحياتنا قررنا إنه نعيش مثل ما بدهم الناس، نحكي مثل ما بدهم ندرس مثل ما بدهم، نصرف ونسافر ونلبس مثل ما بدهم وما كان كثير بحياتنا حرص على إنه نسأل أنفسنا طب إحنا شو بدنا.
قديش مهم نعرف إنه حياتنا النا مش للناس حياتنا هي تاريخنا الشخصي وإحنا اللي منقرر شو ينكتب فيه والناس بعدها بتقرر تقرأ تاريخنا أو لا، تعجب فيه أو لا، ونتذكر إحنا مش برنامج ما يطلبه الجمهور وببساطة كون إنت وبس.
