راديو النجاح – قديش مهم مع أوس الغول اعمل تحديث – الحلقة السابعة
-واحد من الأشياء إلّي ممكن نعملها لما نقدر نوصل لشبكة إنترنت أو واي فاي مجاني إنه نعمل تحديث لبرامج أجهزتنا الذكية اللي دايماً مطوري البرامج بعملوا عليها تحديثات لحتى تتناسب مع إحتياجات مستخدميها.
عمرك فكرت تعمل تحديث لنفسك، لطريقة تفكيرك بالحياة، لطريقة تعاملك مع المشاكل للطريقة إلّي منعبر فيها عن مشاعر الغضب الحب الحزن الفرح، لطريقة تعاملنا مع التجارب الفاشلة إحنا مش بحاجة لحتى نعمل تحديث أي شبكة إنترنت ولاحتى رقم سري، إحنا بحاجة لشغله وحدة، إنه ننتبه لنتائج أفعالنا وخبراتنا السابقة إلّي فشلنا فيها، ببناء علاقات أو بإعطاء انطباعات أولية عن حالنا أو استثمار المواقف إلّي ممكن تبني صور جيدة عامة عنا، خلونا نشوف حجم الخسائر إلّي ممكن يتجسد بكم صديق طلع من حياتنا وليش، بكم فرصة وظيفية أو حتى حياتية اخسرنا وليش، وأسئلة كثير بتختلف من تجارب شخص لآخر قطعا ما بنسألها، لحتى نبكي على أطلال الحزن احنا بنسألها اليوم لحتى نكون جاهزين لتحديث جديد بلبي احتياجات طموحنا وأهدافنا الكبيرة .
إحنا مش لازم نطلب من أنفسنا الفوز الدائم إحنا أهم شي لازم نتحلى فيه هو الشجاعة لأنه هي إلّي بتخلينا نشعر بالصلابة إلّي بتخلي الفخر يتسلل لنفسنا ويستقر هناك مهما كانت نتائج أفعالنا وجهودنا في محاولة عمل نسخة جديدة تتناسب مع متطلبات حياتنا المتغيرة.
قديش مهم إنه نعمل تحديث لمهاراتنا ونظرتنا للأمور في الحياة لنمتلك نسخة محدثة دايماً عن شخصياتنا، التحديث المستمر لازم يكون رغبة قوية بتحتل أهم أولوياتنا في الحياة، إذا كان عنا رغبه أن يكون إلنا أثر في الحياة الثابت فيها هو تغيرها المستمر.
