راديو النجاح – قديش مهم مع أوس الغول – الحلقة الخامسة
-في جزر هاواي، في وسط أكوام من الكتب في آخر صالة مكتبة جامعية وبين صفحات إحدى الكتب كان ستيفن آر كوفي إحدى كبار قيادات التنمية البشرية على موعد مع أكثر العبارات اللي غيرت حياته و طريقة تفكيره بهالحياة كانت هالعبارة.
(بين المثير والاستجابة تكمن مسافة) وبهالمسافة تكمن حريتنا وقدرتنا على إختيار استجابتنا وفي استجابتنا للمثيرات يكمن نمونا وسعادتنا بتكون مصيرنا بهالحياة…بجوز إحنا ما بنقدر نحدد ونتحكم بكل الأحداث والمثيرات اللي ممكن تكون على شكل صعوبات، ظلم، ألم، مرض فقدان عزيز، إحنا فقط ممكن نتحكم باستجاباتنا لقائمة لا تنتهي من هالأحداث والمثيرات وبجوز لو انتبهنا لقصص كل الناس اللي بنفتخر فيهم رح ندرك إنهم تحكموا منيح باستجابتهم وهاد الشي اللي صنع منهم عظماء أمامنا وأمام أنفسهم.
في أشياء قطعاً ما رح نقدر نغيرها بهالحياة في مواقف قاسية وإحنا خروجنا الوحيد بكون من خلال التفكير في الأجزاء اللي ممكن تتغير…نفكر كيف ممكن نحسن الوضع السيء اللي إحنا بنواجه.
آلاف من الناس انسجنوا، وضعفهم خسروا كل شي بملكوه، وأضعفاهم صابهم مرض مزمن وكلنا رح نفقد أشخاص غاليين علينا لو تأملنا بحياة كل فرد من هالأشخاص رح نكتشف إنه جميعهم كانوا على نفس خط البداية في مضمار الحياة ومع شوية تفكير وتأمل بنعرف إنه نهايتهم كانت مختلفة لأنه ببساطة كانت استجابتهم مختلفة كانت على شكل شجاعة، مبادرة، تشبث بالأمل، إنطلاق من جديد، إعادة تخطيط لحياتهم بإمتلاك رؤية وخطوات واضحة.
قديش مهم على مسرح الحياة في كل فصولها ومشاهدها من علاقات ومواقف وقرارات ما نقبل إنه نكون على هامش المشاهد الرئيسية مجرد (كومبارس) من الممكن يكون إله بديل أو بقدم مشهد قدمه كتير من الناس وهو أصلا مشهد مستهلك ومتوقع نتيجته، خلونا نكون أبطال لمشهد غير متوقع بسحر وجودنا بنصنع دور ونقدم مشهد تاريخي رح تتناقله أجيال وتسطره الكتب… ببساطة خلونا نصنع مشهد نفخر فيه بكل حياتنا.
