الحلقة الخامسة من برنامج عسل ولوز – تغذية الأطفال
[soundcloud url=”https://api.soundcloud.com/tracks/328202463″ params=”color=ff5500&auto_play=false&hide_related=false&show_comments=true&show_user=true&show_reposts=false” width=”100%” height=”166″ iframe=”true” /]
اهلا وسهلا فيكم مستمعينا بحلقة جديدة من برنامجكم عسل ولوز على راديو النجاح والي رح نحكي فيها عن تغذية الاطفال من الولاده لحد م يدخلو المدرسه
بالبدايه بدنا نحكي شوي عن المرحله الجنينيه و هي مرحله مهمه جدا فلازم الأم تهتم كتير بحصولها على غذاء كامل متكامل بيحتوي عكل العناصر الغذائيه المهمه لصحتها و صحة البيبي
و هون بدنا نحكي عن اهمية العنصر الفوليك أسيد في بداية الحمل او حتى كمان قبل الحمل لحتى نتجنب أي نقص في هاد الحمض لإنو نقص مستواه في جسم الأم ممكن يؤدي لا قدر الله بخلل في الجهاز العصبي عند الجنين فما تنسى الأم تهتم بصحـتها
و الكل بيعرف إنو الطفل بالأشهر الأولى بيعتمد بحصوله على الغذاء من حليب الأم او من الحليب الصناعي و بيتراوح وزن البيبي بالشهر الأول من 3.5ـ5 كغ .. و طوله من 48ـ53 ســم
و دائما نحنا بنعطي الأولويه لحليب الأم طول م إنو مافي أي مشاكل لا مع الأم ولا مع البيبي لإنو حليب الأم بيحتوي على عناصر مو موجوده بالحليب الصناعي
بالإضافه لإنو الرضاعه الطبيعيه بتحافض على صحة و لياقة الأم بعكس ما بفكرو كتير من الناس
اضافه لإنو الرضاعه الطبيعيه بتقوي العلاقه بين الأم و طفلهاا و جسم الأم بيستهلك حوالي 80ـ85 سعر حراري لإنتاج 155 ملـم من الحليب
كمان حليب الأم بيحتوي على جميع العناصر الغذائيه يلي ما رح تخلينا نتطر نعطي البيبي اي مكملات غذائيه ممكن انها تتسبب في السمنه المبكره عند الطفل
كتيير من الناس بتتسائل متى نبدا ندخل الأطعمه الصلبه للطفل؟
على الأغلب بالشهر السادس و في بعض العلامات برضو بناخدها بعين الإعتبار يلي ازا ضهرت عند الطفل فممكن من خلالها نتوصل انو الطفل قادر انو ياكل أكل عادي و من هاي العلاماات اول شي لما بصير وزن البيبي ضعف وزنه عند الولاده و لما بصير الطفل قادر على التحكم برقبته و راسه
و لما يصير قادر برضو على الجلوس مع قليل من المساعده و لما بيبدا يوعى على اكل العيله و ينتبه للناس و هي بتاكل
على الأغلب رح نبدا بإطعام الطفل الأكل اللي بكون طري و قوامه كثيف متل السيريلاك و المهلبيه و هاي الشغلات في البدايه
و غير هاد الشي ما ننسى إنو لما نبدا ندخل الأكل بالنظام الغذائي للطفل نتأكد إنو ما عندو اي نوع من الحساسيه لأي نوع من الأكل
هلأ كيف بنتأكد ؟ إنو لازم بس نبدا ندخل الأكل ندخل نوع واحد من الأكل باليوم لمدة تلت أيام لحتى نتأكد إنو ما عندو حساسيه منها طبعا الحساسيه بتصير عنا حالات نادره و هيه عباره عن تفاعلات معقده في الجسم بين الأكل و جهاز المناعه
و تعتبر مزعجه بسبب الأعراض يلي بترافقها و هي بتحدث عند الأطفال بس بيتعافو منها لمده اقصاها 15 سنة
و من الأغذيه يلي ممكن تعمل حساسيه عند الأطفال : القمح , الحليب , البيض, انواع من المكسرات , و بعض الفواكه و غيرها.
و في بعض الأكلات يلي ما بتنعطى للأطفال إلا بعد السنه فمتلا بياض البيض ما بصير نعطي قبل السنة
لإنو بيحتوي على بروتين الآلبومين يلي رح يسبب مشاكل عند الطفل في اغلب الأحيان ☺
اما صفار البيض ممكن نعطيه بعد تمن(8) شهور ☺
و كمان العسل ممنوع نعطيه للطفل ئبل عمر السنةة لإنو بيحتوي على بكتيريا اسمها كلوستريدم بوتيلينوم جسم الطفل ما بتحملها
و ممكن تعمل عندو تسمم لا قدر الله
لما نبدا ندخل الأكل للطفل ممكن نواجه بعض المشاكل بالبدايه من أهمها إنو الطفل ممكن يرفض الأكل بالبدايه و يتدلل هون نحنا منشدد إنو الأم لازم تكون صبوره مع الطفل لما تدخل نوع جديد من الأكل كل مررره
و حتى لو رفضو لازم تكرر المحاوله مره و مرتين و عشره لحتى يتقبلو و يتعود عليه و على الأغلب الطفل بيرفض الأكل مو لإنو ما بحبو بس مشان يعزز ثقتو التجريبيه
اهم شي لما يبدا الطفل ياكل لازم نحدد كمية و نوعية الأكل يلي بدنا نعطيه ياها
و لنشجع الطفل على إنو يمسك الأكل بإيدو يلي نحنا منسميها الـ فينجر فود اللي من خلالها بيئدر يمسكها و ياكلها بإيدو
و بنتزكر إنو لما يبدا الطفل ياكل رح تزداد احتياجاتو من المي فبنتزكر دايما انو نشربو مي بين الفتره والتانيه خلال اليوم
ونتجنب نشربو العصائر الصناعيه لانها مليانه اصباغ صناعية وسكر فما لازم تعودو عليها ابدا ونستبدلها بالحليب والعصائر الطبيعيه المحلاه المحضره في المنزل والمي
ومن اهم النصائح لحتا نشجع الطفل على الاكل وهي انه نخليه يشاركنا بتحضير الاكل معنا لما بصير قادر ع هالشي
وناكل معو من نفس الاكل ونحاول نعمله اشكال حلوة ومضحكة بصحن الاكل لحتا يتشجع اكتر ع الاكل
وبرضو ما ننسى الالوان واهميتها وبالزات الخضار والفواكة الملونة ونزين الطبق بلون الاحمر والاصفر والاخضر وغيرها من الاالوان عشان تلفت انتباهه
وكمان ازا حست الام انو طفلها ما عم ياكل منيح ويكسب وزن اهم شي بهالحاله انو ما تتبع اساليب غير صحيه لحتا يتقبل الاكل
اه متل انو نصير نعطيه اكل عالي بالسعرات الحراريه وغير صحيه متل الشوكولاته والسكريات والشبس والحلويات والعصير وغيرها
لانه حتا لو زاد وزنه هاد الاكل رح يشكل خطر كبير ع صحته لقدام
من المهم جدا نهتم بالنشاط البدني للطفل ونتركه يلعب ويتحرك ع راحته
بس طبعا يضل تحت المراقبه لانه النشاط البدني رح بزيد من قدرته البدنيه والعقليه والحركيه وبخلي جسمه اقوى
باخر فقراتنا لليوم بدنا نحكي انو هلا كل الاطفال برمضان بيحبوا انهم يصومو متلنا ويتشجعوا معنا
في كتير من الامهات بيخافو من موضوع الصيام وبيسالو كتير عن هالموضوع
اول شي ايش هو السن المناسب لتعويد الطفل ع الصيام؟
بعد عمر 6-10 سنوات لندرب الطفل ع الصيام بشكل تدريجي وبعد عشر سنوات بامكانه يبدا صيام يوم كامل
ولحتا نتدرج بتشجيع الطفل ع الصيام بكون باتباع ما يسمى ب صيام العصفوره
ففي العشر ايام الاولى من الشهر الفضيل يمكن تصويم الطفل من اذان الفجر حتا اذان الضهر وبعد هيك بنسمحلو ياكل ويشرب لاذان العصر وبعدين بنخليه يكمل صيامه لاذان المغرب
وبالعشر ايام التانيه من شهر رمضان ممكن نسمح للطفل بصيام يوم كامل
وبعدين بفطر باليوم او اليومين الي بعد اليوم يلي صامو وهكذا
بالعشر ايام الاخيرة بكون جسم الطفل تعود ع الصيام وممكن نسمحله بالصيام الكامل بهاي الايام ازا كان بيقدر ع هالشي
واهم شي ننتبه انو ما صار عنده جفاف او هبوط بالسكر خلال الصوم لانه بهالحاله لازم يفطر
وهاشي بنعرفه عن طريق انه الطفل بفقد نشاطه المعتاد وعلامات الجفاف بتظهر ع العينين والبشرة
وبالنسبة لااطفال المصابين بالامراض المزمنه متل السكري او مرض الكلى
حتى الامراض الموسميه متل الرشح او التهاب اللوز او الاطفال يلي بعانو من ضعف الدم هدول كلهم ممنوعين من الصيام
وهيك بنكون ضمنا انه صيام طفلنا سليم وما الو اي اضرار بل بالعكس هيك بنعود الطفل ع الصيام وبنشجعه يصوم معنا وبنعرفه ع القيم الدينيه وبنعرفه ع القيم الدينيه الرائعه الموجودة بديننا
وبهيك بنكون وصلنا لنهاية حلقتنا لليوم بتنمنى انكم تكونو استفدتو واستمعتو معنا مستمعينا,,,واسنتونا بحلقه جديدة من برنامج عسل ولوز على راديو النجاح
