قديش مهم مع أوس الغول – حتى لاتندم

 

راديو النجاح – قديش مهم مع أوس الغول حتى لاتندم – الحلقة الرابعة


-هل خطر في بالنا في يوم  نسأل حد قبل ما يموت سؤال عن شو أكثر شي ندمان عليه بحياتك؟، هل عنا توقع شو ممكن تكون الإجابة؟… في ممرضة إسمها براَوني وير وهي كانت ممرضة أسترالية وكانت بتشتغل بقسم العناية الحثيثة وكانت تجمع كل الإجابات للأشخاص قبل رحيلهم عن هالحياة حتى إنها ألفت كتاب أسمته أكثر 5 اشياء ندم عليها الراحلون.



خلونا نعرف شو هم هالأشياء:

كانت الشغلة الأولى هي التفكير والقلق في رأي الناس ندموا على كل لحظة قرروا إنهم ما يكتفوا بإعجابهم بأنفسهم، ما يوثقوا بذاتهم، ويقبلوا بحالهم، كيف ما كانوا بغض النظر عن رأي الناس فيهم.

الشغلة التانية عدم التعبير عن مشاعرهم خوفاً من إغضاب الآخرين دايماً حريص الناس تكسب وهو يخسر ويضله عايش بحسرة التضحية مقابل لا شيء وكان فينا نختار إنه نعبر عن مشاعرنا بطريقة غير مؤذية ونحترم ذاتنا ومشاعرنا ونعبر عنها بقوة.

الشغلة الثالثة هوكان عدم إدراك إنه السعادة قرار بإيديهم فأجلوا سعادتهم … كانوا في رحلة البحث في كل مكان عن السعادة لحتى اكتشف في نهاية المطاف إنه السعادة كانت بين إيده لأنه السعادة قرار وبنقدر نفكر في أساليب كتير ممكن نحقق فيها السعادة وبالمناسبة حصرت قائمة فيها أكتر من 100 عمل ممكن يدخل السعادة  لقلبك مش بحاجة فيها للفلوس بدها شوية تفكير مش أكثر.

الشغلة الرابعة كانت ضياع عمرهم في اللهث وراء لقمة العيش … ندموا إنهم ما شبعوا من اللي بحبوهم وكان السبب عملهم، ندموا إنهم ما تأملوا بتفاصيل الأشياء الجميلة اللي حواليهم وانغماسهم المطلق في قائمة أعمال ما بتنتهي.

الشغلة الأخيرة كانت عدم إمتلاك الشجاعة لأخذ المغامرات وملاحقة الأحلام … قديش في أحلام ضلت مجرد أحلام وإحنا بنقدر نحققها بشوية شجاعة وخروج من منطقة الأمان وثقة بتجاربنا الماضية ونجاحتنا البسطية ودروس إخفاقاتنا اللي تعلمنا منها.
قديش مهم نجنب أنفسنا ألم الندم في سبعين سنة الله بيعلم إحنا رح نعيشها أو لا خلينا نعيشها بكل تفاصيلها بكل مغامراتها بكل ألمها وأملها لإنه بالألم بنقوى وبالأمل بنحلق.