البرامجعسل ولوز

عسل ولوز مع ميساء أبو الرب وبيان أكرم – الفطور

الحلقة الثالثة من برنامج عسل ولوز – الفطور

[soundcloud url=”https://api.soundcloud.com/tracks/327343671″ params=”color=ff5500&auto_play=false&hide_related=false&show_comments=true&show_user=true&show_reposts=false” width=”100%” height=”166″ iframe=”true” /]

اهلا وسهلا فيكم مستمعينا بحلقة جديدة من برنامج عسل ولوز على راديو النجاح ويلي رح نحكي فيها عن وجبةة الفطور بشهر رمضان

 طبعا كلنا بنعرف انه الفطور بجي بعد صيام تقريبا 16 ساعة يعني نحنا بنحكي عن يوم كامل تقريبا بدون اكل وشرب

فلما نيجي بدنا نوكل اكيد في كتير شغلات لازم نلتزم فيها لحتا ما تتعرض معدتنا للصدمة من الاكل الي رح يدخل فجاه بعد فترة طويله من الجوع ولحتا ما يصير عنا عسر هضم يلي بالعادة بصير عند المعظم منا ولحتا نتجنب هالشي رح نحكيلكم الطريقه المثالية يلي لازم نتبعها لافطار صحي خفيف ع المعدة

 بداية اول ما نبدا ناكل فيفضل نوكل شي يعطينا طاقة بسرعة يعني ما بيحتاج وقت طويل للهضم وهاد الشي رح بكون موجود بالسكريات البسيطة

والمركبات الاخرى يلي ما بتاخد وقت للهضم متل التمر او الفواكة المجففه

او صحن لبن هدول كلهم سريعين الامتصاص لحتا نعوض بشكل سريع الطاقة يلي

فقدناها خلال الصيام

 هلا بالنسبه للبن فهو خيار ممتاز لانه بحسن من حركة الامعاء وهو

مصدر غني بالكالسيوم والبروتين ,, اما التمر فهو كمان رائع بيحمي من

الامساك وفيه مضادات اكسدة وعناصر غذائية مهمه للجسم متل البوتاسيوم وبعض الفيتامينات

 بالتاكيد وبعد هيك بنشرب كاسه مي عشان نعوض السوائل يلي فقدناها

 وهون بدنا نحكي انه بنشرب كاسة مي بالاول قبل ما نشرب اي اشي

تاني وبعدين ازا بدنا بنشرب عصير يفضل يكون بعد المي ويكون طبيعي ونقلل من كميه السكر الموجودة فيه

بعد هيك بنبدا بطبق الشوربة والافضل تكون شوربة شعيرية او شوربه خضار او العدس ونبعد قدر الامكان عن الشوربات الكريميه متل شوربة الفطر

ورح نحكيلكم اليوم كيف بنقدر نحضر الشوربات بطريقة صحية في رمضان

عنا شوربة العدس يلي متعودين عليها كطبق رئيسي عنا في رمضان بامكانا

نحضرها باستخدام المي من دون استخدام مرقة اللحمة او مرقه الجاج

ممكن نضيف الها الكمون والملح كنوع من البهارات  وبرضو البقدونس المقطع بيعطينا قيمةة غذائية عالية

 كمان ممكن نستغني عن استخدام مكعبات مرقة الدجاج بشكل نهائي

لانها بتحتوي على مادة مونوجلتوميت الصوديوم الضارة جدا وبتعطي سعرات حرارية عالية جدا وكميه صوديوم عاليه بتخلينا نعطش اكتر خلال اليوم

 ممكن كمان نحضر شوربه الفريكة بطريقة صحية بمرقة  الدجاج المخففة

او شوربه خضار كمان بنفس الطريقة باستخدام المي او مرقة الدجاج المخففه متل ما قلنا قبل شوي

 غذائنا الصحي المتوازن خلال شهر رمضان بيحمينا من كتير من المشاكل

الصحية يلي ممكن نتعرضلها نتيجة العادات السيئه

والغذاء لحتا يكون صحي ومتوازن لازم يشمل المجموعات الغذائية كاملة من

نشويات ولحوم وخضرة وفواكة والحليب ومشتقاته

 بنقسم الطبق الخاص فينا ع الفطور لاربع اقسام ,, الربع الاول والتاني بتكون من الخضار والفواكة وهاد القسم بحتل المساحة الاكبر وبيتميز بتنوعه بالالوان وغناه بالفيتامينات والمعادن والالياف يلي بتساعدنا على التخلص من الامساك

 والربع التالت بتكون من الحبوب الكامله متل الخبز الاسمر والشوفان والرز

والمعكرونه

 اما الربع الرابع بتكون من البروتين متل الاسماك واللحوم الحمرا والدواجن

وبننصح دايما بانو نبتعد عن مصادر اللحوم المعالجة صناعيا متل السنيورة

والنقانق لانها بتحتوي ع نسب مرتفعة من الدهون والمواد الحافظة والملونات

يلي بتضر بصحتنا

 برضو من الاطباق الرئيسيه عنا بشهر رمضان السمبوسة والقطايف وبحلقتنا لليوم رح بنحكيلكم كيف ممكن نحضرها بطريقه صحيه خفيفة ع المعدة وبسعرات حرارية اقل

 السمبوسك من المقبلات يلي بنعتبرها عاليه بالسعرات الحرارية

لانو عادة بنقليها وحشوتها بتختلف ممكن تكون خضار او اللحمة او الجبنة

حبه السمبوسك باللحمة فيها 130 سعره اعلى شي بيجي بعدين الجبنه بتحتوي

ع 100 سعرة حرارية  واقل شي المحشيه بالخضار

يعني لو تناولنا حبتين ونحنا لسه ما بلشنا فطور بنكون اتجاوزنا ال400

سعرة حرارية يعني تقريبا ربع احتياجاتنا من السعرات هاد وهيك لسه ما بلشنا بالوجبة الرئيسيه

هلا عشان تستمتعو بالسمبوسك خلال شهر رمضان حاولو خدوها محشيه

بالخضار او جبنة قليلة الدسم ويفضل شويها بدل ما نقليها

 بالنسبه للقطايف دايما مشكلتنا فيها بتكون بالقلي وبكمية الدهون الموجوده فيها و بحشوتها هلأ بالنسبه للئطايف بالجبنه يلي بنحضرها بالبيت الحبه منهت بتحتوي على 275 سعره حراريه بالمقابل ئطايف الجوز بتحتوي على 320 سعره حراريه

 ممكن نحضر الحشوه بطريئه صحيه عن طريق استخدام الجبنه اللايت و ممكن نضيفلها شوية قرفه و نستغني عن السكر و بالنسبه للئطاايف بجوز بنضيف معها شوية ئرفه و بنستخدم الئطر كـ محلي لـ إلها

 اما بالنسبه للئطر ممكن نحضرو منزليا متلا ممكن نستخدم لكل كاسة مي كاسة سككر بدل م يكون لكل كاسة مي كاستين سكر

 ممكن كمان نستغني عن القلي بالشوي بإنو ندهن الئطايف عن طريق الفرشايه بكميه صغيرة من الزيت و نحمرها بالفرن

 ويفضل بعد وجبة الفطور بساعتين تقريبا نطلع نتمشى من نص ساعه لساعه لحتا نهضم الاكل ويفضل كمان بعد صلاه التراويح نتناول وجبه خفيفه

متل الفواكة او اللبن او الحلو

مقالات ذات صلة

 ومن الضروري كمان نشرب من 6-8 اكواب مي بعد الفطور على فترات لحتا نعوض السوائل ونحافظ على عمل الكلى

 وبهالطريقه مستمعينا بنكون حصلنا على فطور رمضاني مثالي متوازن

وجنبنا حالنا كتير من المشاكل الهضميه يل ممكن تصير معنا وحافظنا على توازنا قبل وبعد الفطور وبنتمنالكم صيام مقبول وافطار شهي وشكرا الكم مستمعينا واستنونا بحلقة جديدة من برنامج عسل ولوز على راديو النجاح

 

اظهر المزيد

مقالات ذات صلة