البرامجمنا وبينا

برنامج منا وبينا مع مريم الجميلي – إبراهيم حسين حمدته

راديو النجاح – برنامج منا وبينا مع مريم الجميلي إبراهيم حسين حمدته – الحلقة الثانية

-مسائكم نجاح مستمعينا الكرام بحلقتنا لهاليوم من برنامج منا وبينا اللي رح تسمعو على راديو النجاح…

 

مرات هواية نسمع من مدرسينا وأهلنا انو ماكو كلمة مستحيل بالقاموس، وإنه كلشي ممكن بهالحياة. بس شوكت أخر مرة برهنا هالموضوع بالفعل مو بس بالكلمات؟

إذا إحنا بأول فشل ننهزم ونبطل ونحرد، شلون لعد نحقق وننجز ونوصل للي نريده؟

وأول منكول إنه إحنا ضعاف ومنكدر، يهجمون علينا الناس، إنه شفت بيل غيتس مؤسس شركة مايكروسوفت شسوة؟ زين إني مو هو، ما أشبهه، هو إنسان امتلك كلشي عدا الفلوس، إني ماعندي أي شي.

وبحلقتنا لهاليوم حنكتشف إنو حتى الي ميمتلك أهم جزء من مقومات حياته يكدر يحقق ويكون انسان عظيم.

خليكم ويانا منطول عليكم..

بطل انولد من رحم المعاناة . اول لاعب كرة منضدة ينافس بأولمبيات ذوي الإحتياجات الخاصة بدون ذراعين وباستخدام اسنانه بدل ايدييه .

عرفتوه لو بعد؟

هو المصري إبراهيم حسين حمدتو صاحب الإرادة الحديدية والعزيمة الماسية….

خسر حمدتو ايديه الاثنين بحادث قطار من جان عمره 10 سنين، وبعد مكعد بالمستشفى وشاف إنو ايديه مموجودات دخل بمرحلة من الاكتئاب وانطوى على نفسه  لمدة 3 سنوات، 3 سنوات بدون طلعة أو طبة وبدون علاقات اجتماعية.

حاول أصدقائه لفترة طويلة إنه يخلوه يرجع للرياضة خصوصا انه هو من محبي الرياضات بشكل عام ,والطوبة  وكرة المنضدة بشكل خاص .

وبعد هالفترة الطويلة قرر حمدتو يرجع ويلعب طوبة وية اصدقائه بس جان مدربه من المعارضين للفكرة خصوصا إنه إعاقته جانت تمنعه يوكف كلما يوكع عالكاع، بعد هالشي لجأ حمدتو لكرة المنضدة إلي شاف بيهة أمل علمود يقهر المستحيل ويثبت وجوده بهالعالم.

فاز بميداليات هواية، منها : الميدالية الفضية لبطولة افريقيا لعام 2011 و13 و 15.

حقق حلمه بأولومبيات ريو دي جانيرو لمن كدر يواجه المصنفين الأول والثاني عالمياً، الصيني ماي لونغ والياباني جون ميزوتانيه وانبرهو الثنين بمهاراته العالية رغم اعاقته الجبيرة .

خسر حمدتو هالبطولة بس هالشي منزله من عيون خصومه وخلى كل العالم يشوفه ويشجعه ويحبه، وفوك كل هذا حمدتو ديدرب حالياً طفلين بلا ايدين وفق ما أكده الشوبري وكال إنه هو يريد يمنح هالطفلين المهارات إلي مكدر أي أحد  يمنحها اله من جان صغير.

ضلكم مأمنين إنه ماكو شي مستحيل، وإنه إذا أحد كدر يسويها ليش ما أكدر اني هم؟

 

وننهي حلقتنا باقتباس أحبه جداً والي يكول :

(قل للمستحيل مستحيل أن تكون مستحيلا)

وهيج انتهت حلقتنا لهاليوم جانت وياكم مريم الجميلي وهذا برنامج منا وبينا
ودمتم سالمين…

اظهر المزيد

مقالات ذات صلة