الحلقة السادسة من برنامج عسل ولوز – الريجيم
[soundcloud url=”https://api.soundcloud.com/tracks/329343890″ params=”color=ff5500&auto_play=false&hide_related=false&show_comments=true&show_user=true&show_reposts=false” width=”100%” height=”166″ iframe=”true” /]اهلا وسهلا فيكم مستمعينا بحلقة جديدة من برنامجكم عسل ولوز على راديو النجاح ويلي رح نحكي فيها عن الريجيم واذكرتي لحميات الغذائيه واهم الشائعات عنها
بداية خلينا نتعرف ع مفهوم الحمية الغذائية في عالم الغذاء والصحة
الحمية هي اتباع نظام غذائي معين ومدروس للمحاولة للوصول لوزن معين سواء كانت الحمية يلي بنتبعها هي لتخفيف الوزن او لزيادة الوزن
ذكرتي شغلة كتير مهمه ميسا انه لما نجي بدنا نمشي على حمية معينه لازم
نستشير اخصائي تغذية بالموضوع لانه هو الشخص الوحيد يلي بقدر يقرر ازا كانت الحمية مناسبه او لا
صحيح لازم كمان ننتبه انه هلا مع السوشل ميديا الناس عم تحصل ع معلومات معظمهاا خاطئة وغير دقيقة ابدا فمن الضروري انو نستشير خبير تغذية
قبل ما نمشي ونتبع اي حمية سمعناها من الناس او السوشال ميديا
وهلا بدنا نتفق معكم مستمعينا على موضوع كتير مهم انه الحمية ما بتمنعنا ابدا من انا ناكل الشي يلي بنحبه بل على العكس نحنا بندخل بالحميه كل الالشيا يلي بنحبها وبنفضلها بس انه ممكن نتحكم بنوعيه وكميه هالشي يلي نحنا حابين ناكله بدون ما نحرم حالنا منه
بالتاكيد لانه حتا لو حرم حاله من شي معين ونزل وزنه كيلو غرامات بسيطة اول ما يترك حيرجع يزيد وزنه متل ما كان
فنحنا عادي بناكل كلشي بنحبه وممكن نلتزم بالوقت والكميه والنوعيه المناسبه
كيف بدنا نعرف انه الحميه الغذائيه يلي بنمشي عليها صحيه او لا؟؟
بداية لازم تحتوي على جميع المجموعات الغذائية من حبوب ولحوم وخضار وفواكه وحليب
لازم يتوافر فيها جميع العناصر الغذائيه اللازمة لامداد الجسم بالطاقة طول اليووم
وتكون الحميه سهلة التطبيق وما بتشكل عبئ مادي ع جيبتنا
وانه يساهم هالنظام الغذائي الي نحنا بنتبعه في التحسين من صحتنا وما يسبب التعب والارهاق والدوخة
وهلا بدنا نحكيلكم اهم الاسباب الي ممكن تكون وراء زيادة الوزن
عدم تناول وجبة الفطور لانه زي ما بنعرف وجبة الفطور مهمة كتير
ولا حد يعتقد انه ازا اهمل وجبة الفطور انه هاد الشي رح يساهم في نزول الوزن
بل ع العكس اهمالنا لوجبه الفطور رح بخلينا نتناول اكل اكتر خلال اليوم
وكمان لما نجي نتناول وجبه الفطور نتناولها شوي شوي وما نسرع بالاكل ونمضغ الطعام منيح لحتا نتجنب المشاكل الهضميه وتناول كميات اكبر من احتياجتنا وخلو دايما ببالكم مستمعينا الحكمه يلي بتقول تناول فطورك كالملك وغدائك كالامير وعشائك كالفقير
تناول المشروبات الغازيه حيث انه المحليات الموجودة فيها بتزيد من رغبتنا بتناول الاكل والحلويات
برضو تناول الاطعمه الخاليه من الدهون يلي بتكون بالعادة موجودة بكثرة
بالمحلات والمتاجر ,,لانهم بيستخدمو السكر لتعويض النكهه لانه ما فيها دهوون وهيك بتصير ترفع من الوزن بدل ما تنزله
الامتناع عن تناول الكربوهيدرات وعدم تناولها ممكن في البدايه يسبب خسارة الوزن بس بعدين رح نلاحظ انه رح يزيد وزنا من جديد
استبدال المي بالعصائر وهاد الشي ضروري ننتبهلوو انه لما نشعر بالعطش
دايما ضروري نشرب مي مو عصير لانه العصير غني بالسكر وهاد الشي بيفرق معنا كتيير بالوزن
عدم تناول الخضار والفواكه بشكل يوومي كتير من الناس بينسووا ياكلو خضاار وفواكه خلال اليوم وبالزات الفواكة بينسوها لانه الخضرة ممكن تدخل بوجبه الغدا اما الفواكه بينشغلو عنها باكل الحلو والشوكولا وغيرهاا وطبعا الفواكة الها دور كبير بالمحافظه على جسم صحي ورشيق وبننصح بتناول 3 حصص من الفواكه يوميا على فترات
ولازم لما ناكل نترك فراغ بمعدتنا يعني ما ناكل لحتا تتعبا ع الاخر ولازم ننام اقل شي من 6-8 ساعات باليوم لانه ازا سهرنا رح نضل ناكل طول ما احنا صاحيين وبرضو في هرمونات بتتعلق بالسمنه ما بتشتغل الا لما بنام
ولازم كمان نمارس الرياضة بشكل منتظم وبالزات الرياضه الهوائية متل المشي والسباحة ونط الحبلة وغيرها لانه هي كفيلة بازاله الدهون الزائدة سواء كانت متراكمه في المنطقه العليا او السفلى بالجسم
وتكون اقل اشي 3 مرات بالاسبوع من نص ساعه لساعه مو اقل من هيك لانه الجسم ببدا يحرق الدهون بعد عشرين دقيقه من التمرين
ونزول الوزن الطبيعي بفقدنا 10% من وزننا فقط كل 6 شهور كما انه الحميه السليمه بتفقدنا من نص كيلو لكيلو بالكتير بالاسبوع الواحد وغير هيك بتكون حميه غير سليمة ع الاغلب ورح تلحق ضرر بجسمنا وصحتنا
اما بالنسبه للسعرات الحراريه بكون الهاى حد بالنسبه للذكور بتكون اقل شي 1600 سعر حراري ولاناث 1200 سعر حراري
وازا في حميه بتكون سعراتها اقل من هيك فهاد الشي خطير عصحتنا وممكن يادي لارهاق الجسم وسقوط الشعر ونقص ببعض الفيتامينات والمعادن واول ما نتوقف عنها رح يرجع وزنا يزيد اضعاف يلي نزله
وفي بعض الحميات يلي انتشرت بالفترات الاخيرة بين الناس وصارو يمشو عليها هالحميات ع اختلاف مسمياتها ممكن تاثر ع صحتنا حتا لو ساهمت بتنزيل الوزن لانه الحميه المفروض تكون متنوعه ومغذيه للجسم متل م قلنا قبل شوي
وهلا رح بنحكيلكم عن اكتر هالحميات المنتشرة بين الناس
حميه الملفوف وتعتبر من الخرافات الغذائيه يلي ما الها اي علاقه بنزول الوزن وازا كنت من الاشخاص يلي نزل وزنك عليها فالسبب هو مو الملفوف بل لانك تناولت سعرات حراريه اقل
حميه فصيله الدم وهي حميه بترتكز على حقيقه انو الاكل بتفاعل حسب فصيلة الدم وهاد النظام من البدع بالحميات الغذائيه بيعمل على ازاله مجموعه غذائيه كامله يلي بسبب عنا نقص كثير من العناصر الغذائيه وهاد الشي خطير جدا
عنا كمان حميه اللبن والليمون او اللبن والتمر ويلي بيعتقد كتير منا انو الها قدرة على حرق الدهون في مناطق محدده بالجسم وانو هاي هي الخلطه السحريه بتكون قبل النوم وبدنا ناكد انو هالشي مو صحيح ولو نزل الوزن عليها فهاد بكون بسبب استبدالها بوجبه العشا
اخر حميه الي هيه حميه البندورة وهي بتكون بانه البندورة ممنوع تدخل بالنظام الغذائي ظنا منهم انها بتحبس السوائل بالجسم وبالتالي بتزيد الوزن وطبعا البندورة بريئه من هاي التهمه
هلا السبب يلي ممكن يخلي بعض انواع الطعام تسبب احتباس السوائل بالجسم هو تواجد عنصر الصوديوم فيها
والبندورة بتحتوي على كميه قليله من الصوديوم بل على العكس هي بتادي
لادرار البول لانها بتحتوي على نسبه عاليه من البوتاسيوم ويلي بشتغل عنا عكس الصوديوم
مشان هيك كلو بندوره متل ما بدكم وعلى العكس هي رح بتساعدكم بالريجيم
لانها غنيه بالالياف وبتعطيكم شعور بالشبع لو تناولتوها بين الوجبات
في ناس كتير بحبو يخلصو من اوزانهم بسرعه وبدون ما يتعبو حالهم او ينظمو اكلهم فبيالجاوو لاستخدام الادويه بدون استشارة اخصائي التغذيه بالموضوع
وطبعا تناولكم لاي من هالادويه بشكل عشوائي رح بيعمل على التاثير على عمل الكلى والكبد والهرمونات لانه معظمها بيحتوي على مواد كيمائيه مسرطنه
ومتل ما ممكن انو نعاني من زيادة الوزن برضو ممكن كمان نعاني من نقصان بالوزن عن الحد الطبيعي فبدنا نحككيلكم بعض الامور يلي ممكن تساعدنا بانا نزيد من وزننا
اول شي نحاول نهيء حالنا على انا مقبلين ع تناول كميه طعام اكتر من المعتاد
وانك حتاكل حتا لو مو جوعان
بنحط منبه كل 3 ساعات لحتا يزكرنا بوقت الوجبه
تناول وجبات صغيرة غنيه بالسعرات الحراريه متل الفواكه المجففه ,,المكسرات,, الحليب,,كوكتيل الفواكة بالحليب والحلاوة
ممارسة رياضة رفع الاوزان وتناول مصدر غني بالبروتين والنشويات بعدها
تجنب الاطعمه المقليه والدسمة يلي بتحتوي على الدهون المشبعه حتا لو كنت بترغب بزيادة وزنك
هلا بالنسبه للناس يلي حابه تنزل وزنها ومتكاسله او مو قادرة تلتزم بالريجيم فشهر رمضان وقت مناسب لحتا يتشجعوا ويبدو بالريجيم لانه الصيام بقلل من تخزين الدهون بالجسم بس لوحده ما بكون كافي لحتا نخسر من وزننا
الحد من الدهون والسعرات الحراريه متل السكر والحلو وزياده تناولنا للخضار والفواكة وتقليلنا من تناول النشويات هي رح بتكون تدابير افضل لتخفيف الوزن
وبهيك بنكون وصلنا لنهاية حلقتنا لليوم بتنمنى انكم تكونو استفدتو واستمعتو معنا مستمعينا واسنتونا بحلقه جديدة من برنامج عسل ولوز على راديو النجاح
