البرامجعسل ولوز

عسل ولوز مع بيان أكرم وميساء أبو الرب – أمراض الجهاز الهضمي

الحلقة العاشرة من برنامج عسل ولوز – امراض الجهاز الهضمي

[soundcloud url=”https://api.soundcloud.com/tracks/331169542″ params=”color=ff5500&auto_play=false&hide_related=false&show_comments=true&show_user=true&show_reposts=false” width=”100%” height=”166″ iframe=”true” /]

 اهلا وسهلا فيكم مستمعينا بحلقه جديدة من برنامجكم عسل ولوز والي رح نحكي فيها عن مجموعه من امراض الجهاز الهضمي واكثرها  انتشارا بين الناس وطرق السيطره عليها تغذويا  تعتبر امراض الجهاز الهضمي من اكثر الامراض المنتشرة بين الناس وبيرجع السبب لانه هالشخص ما بكون عنده نظام بالاكل من ناحيه نوعيه الاكل يلي عم ياكله اهم شي والكميه والوقت الي بتناول فيه الشخص الاكل الي بميز امراض الجهاز الهضمي عن غيرها انه ما الها حميه معينه نمشي عليها فهي مجرد تعليمات بيعطيها بيعطيها اخصائي التغذيه للمريض وكمان انه امراض الجهاز الهضمي ما فينا نتخلص منها نهائيا او انا نعالجها فنحنا منتبع مجموعه من التعليمات لحتا نقلل من مضاعفاتها ونتعايش معها قدر الامكان وهلا بدنا نحكيلكم اهم واشهر امراض الجهاز الهضمي والارشادات الهامة لحتا نتجنب مضاعفاتها ع صحة المريض

بنبداها بالارتداد المريئي وعلاج هالمرض ما بيعتمد بس ع الاكل فبيحتاج كمان لاستخدام الادويه والتغيير بنظام الحياه وبيحتاج للجراحة ببعض الاحيان

ومن اهم الارشادات عنا هي تقليل تناول الدهون وتجنب المواد المهيجة متل النعنع والمشروبات الغازيه وعصائر الحمضيات ومنتجات البندورة والقهوة

 يفضل عنا كمان بتناول وجبات صغيرة للتقليل من ضغط الاكل ع المعدة

وبالتالي تخفيف ارتداد الاكل للمريء والمحافظه ع الوضع القائم خلال وبعد الاكل

تجنب النوم بعد الاكل مباشرة

ويفضل رفع الراس اثناء النوم  وكمان التوقف عن التدخين وتجنب الملابس الضيقه خاصه بمنطق البطن

نجي عنا للمرض التاني وهو قرحة المعدة وهي عباره عن حدوث تاكل موضعي بالغشاء المخاطي لجدار المعدة او الامعاء او التنين مع بعض


ومن اهم اعراض هالمرض الم حارق وحاد باعلى البطن وممكن يحدث 
نزيف دموي بسيط في بعض الحالات  عبر الفم او مع البراز

 ومن اهم الارشادات يلي بتخص هالمرض تناول تلات وجبات منتظمه ونجنب تناول وجبه خفيفه خصوصي وقت النوم

 وتجنب اكل كميه كبيره من الطعام بالوجبه الوحدة

 ويفضل الاكل ببطء ومضغ الطعام بشكل جيد كما انو يفضل تجنب الاطعمه والمشروبات شديدة البرودة والسخونه وعدم شرب كميه كبيره من المي اثناء تناول الوجبه

تالت مرض عنا هو التهاب الامعاء او المعروف بتقرح القولون وهو مرض بيتسبب بتكون التهابات وتقرحات بمناطق متعددة بالقناه الهضميه وبيتسبب هالمرض في حالات متكررة بالاسهال

 وفي حال استمرار الاسهال هالشي رح بيادي لفقدان السوائل بالجسم وسوء امتصاص الاكل وهالشي ممكن يادي للجفاف وفقر الدم وفقدان الوزن  بشكل حاد وممكن يادي بنهايه الامر لا سمح الله لسرطان القولون او المستقيم

 اما بالنسبه لاهم الارشادات العامه لهالمرض فهي كتالي اولا التقليل من الحليب او تجنبه بسبب عدم تحمل الامعاء لاله وممكن تستبدله باللبن الرايب بداله

 تناول الاسماك والدواجن  واللحوم الطريه بدل اللحوم الحمرا القاسيه لانه بينتج عنها فضلات اقل

 لازم برضو المريض ينوع من الاطعمه وما يتقيد بنوع محدد منها فلازم يشمل الاكل لبن ولبنه وجبنه ولحوم وخبز ونشويات وخضرة وفواكة حسب درجة تحمل المريض الها


التقليل من الاطعمه المطبوخه بصورة معقدة متل المنسف والمقالي 
والدهون المشبعه لانه بينتج عنها فضلات واستبدالها باطعمه بسيطه متل اللحمة المسلوقه او المشويه واللبن والرز المسلوق

 اخر مرض بحلقتنا لليوم هو حرقه المعدة وحرقه المعدة هي ارتداد حمض المعدة باتجاه المريء وحاله الشخص بتزداد سوء ازا تمدد او انحنا للامام

هلا في عنا بعض الاطعمه يلي بتحفز من حرقه المعدة اكترها بكون الاكلات المبهرة والحارة المنتجات الحمضيه البندورة ومنتجاتهاا والاطعمه المقليه يلي  بتحتوي على دهن عالي والشوكولاته والمشروبات الغازيه والنعنع

 ولتقليل من حدوثها بننصح ب  المحافظه على وزن صحي وانو نبعد عن الاطعمه يلي زكرناها قبل شوي

 عدم لبس ملابس ضيقه وعدم التمدد بعد الوجبات  الامتناع عن تناول وجبات دسمة خصوصي بفترة المسا ورفع الراس بمستوى اعلى من باقي الجسم عند النوم وكمان الابتعاد عن التدخين

 وهيك بنكون وصلنا لنهايه حلقتنا لليوم بنتمنا تكونو استفدتو واستمتعتو معنا مستمعينا واستنونا بحلقه جديدة من برنامج عسل ولوز على راديو النجاح

 

 

 

اظهر المزيد

مقالات ذات صلة

شاهد أيضاً
إغلاق