البرامج

برنامج سوشليات / الحلقة الاولى

يسعد اوقاتكم اعزائي المستمعين و حياكم الله بأول حلقة من برنامج #هاشتاك
تقبلوا مني كل الحب والتقدير انا في الاعداد والتقديم حسن عادل واتمنى لكم حسن الاصغاء والاستمتاع

اليوم راح نعرف الـ (top 5) لاشهر واغرب تغريدات في التويتر على مستوى العالم لهذا الاسبوع

حيث حصل على المركز الخامس (#قمة_الرياض )
بعدد 86.7 الف تغريدة نظرا للقمة الي صارت بالسعودية العربية وزيارة الرئيس الامريكي ترامب هالشي سبب ضجة بمواقع التواصل الاجتماعي

بينما حصل على المركز الرابع (#halamadrid)
بعدد 90.1 الف تغريدة لفوز النادي الملكي ريال مدريد بدوري الليكا الاسباني واكيد فرحة جماهيره كانت كبيرة بهذا الفوز (يستاهلون صراحة )

وحصل على المركز الثالث (#الدراز)
بعدد 90.1 الف تغريدة نظرا للاعتداء الي صار بالبحرين من قبل الحكومة البحرينية على الشيعة البحرينيين وانصارهم و قتل الشهيد محمد الساري

وحصل على المركز الثاني (#الصرخي_محقق_معاصر)
بعدد 99 الف تغريدة .. كونه يختتم محاظراته التاريخية العقائدية بالتكبير والصلوات

وحصل على المركز الاول (#Manchester)
بعدد 2.25 مليون تغريدة بسبب الاعتداء الارهابي الي صار بمدينة مانشستر البريطانية والي راح ضحيتها 81 شخص ما بين قتيل وجريح
وصرحت السلطة البريطانية انها قامت بالتعرف على هوية القاتل لكنها لن تصرح به حتى تعرف فيما اذا كان هذا فعل طائش من شخص او مدبر من قبل مجموعة

والان اعزائي المستمعين وصلنا لفقرة اغرب والطف التغريدات والتعليقات على اهم المواضيع الي تدور بالتواصل الاجتماعي :

من التغريدات المؤثرة الي لفتت انتباهي حقيقةَ هي تغريدة على اعتداءات البحرين تكول :

لا يسلم الشرف الرفيع من الاذى
حتى يراق على جوانبه الدم
#ثورة_البحرين_خالدة_حرة

وتغريدة اخرى كانت على احداث مدينة مانشستر البريطانية تقول :

I see human but not humanity

وصراحة عجبني هاشتاك منتشر بتويتر اسمه (كلشي اتوقع)

من الطف التغريدات الي قريتهن عليه كانت :

– في لحظة غضب قالت له : خذ كل شي يخصك وروح
فامسك يدها
ف هي ابتسمت وشعرت بالخجل
فقال لها انزعي المحبس والسوارات اني جبتهن
#كلشي_توقع

التغريدة الثانية كانت :
– اللي ما تزوجوا وحاسبين القطار فاتهم
ابشركم تره الي تزوجوا انكلب بيهم القطار
#كلشي_اتوقع

اما التغريدة الثالثة كانت تكول:
– بعض البنات اذا ايست من الرجيم تكول عادي , الشباب يحبون المربربة
ابشرج تره هم كلشي يحبون حتى المعوقة
#كلشي_توقع

اما التغريدة الرابعة تكول :
– #كلشي_اتوقع من شخص ياخذ اغلب القرارات قبل لا ينام واول ما يكعد من النوم ينساها كلها !!

والتغريدة الخامسة تكول :
– #كلشي_اتوقع بس بنات عدها شوارب ماجنت متوقعها
(مو خوش سالفة هاي ههههههه)

واخرى تكول : #كلشي_اتوقع بس اتعين مستحيييل
(للاسف عدنا بالعراق سالفة التعيين مستحيلة)

وغيرها تكول : #كلشي_اتوقع بس لا تتوقع خير من شعب يبقى على سالفة. اهلا مولانا. اتفضل مولانا. استريح مولانا. تأمر مولانا. تاج راسي مولانا

والتغريدة الثامنة تكول :
#كلشي_اتوقع من شخص يكول ششترجى من شعب وهو من نفس الشعب

واكو تغريدة تكول :
– هناك عائلات ستجتمع على الافطار لكن ينقصهم احد افرادها
ليس شهيد وانما طالب كلية هندسة لديه امتحانات فاينل
#عيشتيش
(طبعا هاي حالتي ههههه)

وتغريد ثانية على نفس الهاشتاك تكول :
سأل رجل صديقه :
كم كلفك هذا الحذاء الجميل
فأجاب الرجل : ركعتين !!
طلع بايكة من الجامع هههههه
#عيشتيش #صلاتيش

واكو تغريده ضحكتني صراحة تكول :
#احلى_شي_بالعراقيات الرومانسية عدها انو تخلي لزوجها اكبر لحمة بالمرك (طبعا هذا الي يحصل اكبر لحمة هذا مجنص)

ولهنا وصلنا وياكم احبتي المستمعين الى نهاية حلقتنا لهذا الاسبوع
اتمنى قضيتوا ويانه وقت ممتع وانتظروني بحلقة جديدة بالاسبوع الجاي
ورمضان كريم عليكم وان شاء الله ينعاد على كل العراقيين بالخير والامن والصحة والعافية
وبالختام تقبلوا مني اطيب التحايا
مع السلامة

اظهر المزيد

مقالات ذات صلة

شاهد أيضاً
إغلاق